Sekrek lawrkhawm

Zu pawl hmul tihfai dan: Lo a buhpawl a awm thin Sazu hi Zu pawl an ti a, a duh tan chuan a sa hi a tui em em a. A hmul tihfai hi a hautak vein, mei a rawh a, ziah fai a ni tlangpui thin a, hetia ti lo hian awlsam tein a tihfai mai theih a. A tihdan tur chu, Buar- (Chul velah hian a tam duhin, a par a leng sup sup thin, Buar thau hi chu a ni lo) kung, a hnah awmin thliak la, chu chuan ZU PAWL a hmul tihfai ngai chu vaw rawh. SAZU hmul chu a til duak duak mai ang.

Mizo chhang chhum hmin hun hriat dan: Mizo chhang ban hi chhum laiin a hmin tawh em tih hriat i duh chuan, Bel-a i chhum chuan a khu lo chhuak kha i kutin lo dawh la, i kut chu han tumbailek teh, a ban chap chap chuan i chhang chhum kha a hmin tawh tihna a ni a, ala ban chap loh chuan ala hel a, suam ala hun lo tihna a ni mai.

Eisual damdawi:Thil eisual hi a hrehawmin, a haw zual tan phei chuan thihpui mai pawh hlauhawm tak a ni. Arsa i ei sual chuan Khanghu hnah a helin ei rawh. Hnah hnih khat i ei ang a, a dam hmak mai ang. Khanghu ei tur a awm lo chuan Arhmul kha rawh la, a vap ei mai rawh.

Perek chhun palh damdawi:Perek rah palh vel hian perek hlui anih phei chuan a pun duh em em mai a, chutiang a i awm hlauh chuan a pemah khan Ser rah sawr rawh. Ser rah a awm loh pawhin Ser hnah pawh nuai sawm la, a tui a awm loh pawhin tui tlem thlawr la, chu chu a pemah chuan thlawr rawh. Pun miah lovin a dam hmak mai ang.

Mizo upa chuan Perek hlui rah palh/ intihpalh ah hian intihpalh hlimah khan a perek a kha changel kungah vit bur ila, a na pawh a reh huai huai a, a dam vat mai, pun miah lovin a dam thei an ti a, hei hi tam takin a ni tak tak an ti ve tlat. Ka hmuh lai ngeia ti pawh an awm ve tlat.

Gas hman rei dan:Ei rel nana Gas kan hman hi a ral dawn lamah hian kan hman zawh vek hma hmain a alh tha tawk lo fo thin a, a zo rat a hman tur phei chuan a alh a chak loh avangin tam takin kan hman zawh hmain bur tharin kan thlak fo thin a ni. I Gas cylinder-a Gas awm kha hman zawh vek i duh chuan a zawh dawn hnaih tawh a, a alh a chak tawh loh hunah khan Gas bur kha Chawhtawlh-ah Tui lum/Sa dahin, tah chuan chiah rawh. Tui luma Gas bur i chiah khan Cylinder chhung a Gas chu a volume a expand tir ang a, a hma a alh tha thei tawh lo, hman theih mang tawh lo kha tha takin eirawngbawl nan i hmang leh thei mai ang.

Kang damdawi:Mei leh Tui sa hmanga intih kan hian tam takin a enkawl dan tur kan hriat loh avangin hmel leh hmai, vun kan tikhawloin, ser nalh lo tak awm phah fo thin. I intihkan palh chuan Panhnah (Kuhva khawrna pan hnah hi) hi Chini (thingpui thlumna hi) nen sehsawm la (Deng sawm la), a tui kha a kang laiah chuan hnawih rawh. Panhnah sehsawm kha duh leh tuam hnan la, a kang sa vut vut kha a dai nghal huai huai mai ang, chu mai ni lovin, kang avanga vun ser leh khawr awm lovin, kang nasa viau emaw tihah pawh tha takin a dam hlen leh thei a, a tihchi khawp mai.

There are currently 26 visitor(s) online