MIZORAM YOUTH COMMISION DIN THAR

        Mizoram Sawkar chuan chuan Mizoram Youth Commission a din ta a, hei hian thalai hna hmu lote hnathawh tur kawhhmuhna bakah, thalaite hmakhua hrang hrang a ngaihtuah dawn a ni. Mizoram Youth Commission hian Website thar hawngin, hetah hian thalai hna zawng laite tan India ram hmun hrang hranga hnaruak hmuh theih a tarlan a ni dawn a, website hi kar tin update a ni ang. Website hi www.mycmizoram.com a ni.

DEO PANGA SUSPEND

        Mizoram Sawkar chuan ni 31st January, 2009 khan Mizoram chhunga High School leh Higher Secondary School-te sakna tur pawisa tihchingpen chungchangah DEO panga-te Suspend-na Order a tichhuak. Heng DEO suspend takte chu:

         1.Pu.R.Lalthuamliana, Aizawl, DEO;

         2.Pu. C.Lalngaihthanga, Saiha, DEO

         3.Pu. C.Lalnghinga, Lunglei, DEO

         4.Pu. Zolawma, Serchhip, DEO

         5.Pu. K.Lalrintluanga, Champhai, DEO

 Tun hnai khan MZP-te chuan Mizoram chhung a H/S leh HSS -te sakna tur sum (Sikul 12 ta tur) tam tham tak chu a dawngtu turte hnena pe lovin, a riral ni a an hriat thu Education Minister Pu.Lalsawta leh Chief Minister Pu.Lalthanhawla te hnenah thlenin, he thil hi chhui chiang a a mawhphurtu dik tak chunga action la turin an ngen a. He thu hi Minister-in dan anga lo bawhzui a tiam ang ngeiin, hma lak zui a ni ta a ni. An sawi dan chuan, Sum hi nikum, 2008 daih tawha sunction ni tawh mahse, vawiin thleng hian sum dawngtu tur School-te hian vawiin thlengin sum an la dawn theih loh bakah (Sum a awm lo an tih avangin), a then phei chuan School sakna tur sum an hmu tih pawh an hre lo niin an sawi.

         High School 12 sakna tur zinga sum thenkhat Rs. 18,59,787 a bo ni a sawi chungchang hi MZP chuan sawi chhuakin, Jan 23, 2009 khan ACB-ah FIR an theh lut a, ACB lamin thil chhuifiah tlak (Prima Facie Case) an hmuh avangin chhui zui tura tih a ni ta a ni. MZP lam sawi dan chuan kum2007-08 Plan sum atangin Education Department-in H/S 12 sakna tur hi March 3, 2008-ah hmuin, March 31, 2008 ah lak chhuah a ni a. Sikul sakna tur pek turte chu Rs.4,97,000 theuh pek tura ruahman a ni a, mahse, supervision atan Rs.8,939 theuh leh VAT atan Rs. 19,520 (4%) theuh pawh then sak an nih hnuah Rs.4,68,541 theuh dawng tura tih an ni.

       Heng sum te hi DEO kaltlanga pek an ni a. Sikul 2 chauhin a kimin an dawng a, sikul 7 chuan a kim loving an dawng a, sikul pathum phei chuan cheng khat mah la dawng lovin, dawng tur an ni tih pawh an la inhre lo a ni.

STADIUM SA TAN DAWN

        Congress thupuangtu, Pu.Ronald Sapa Tlau chuan thuthar lakhawmtute hnenah ni 30/1/2009 khan NLUP bul tanna atan vaibelchhe 100 an neih tawh thu leh, STADIUM sak hna pawh thla khat chhungin bul an tan dawn thu leh, a bul tan nan cheng vabelchhe 25 a awm tawh thu a sawi a. Hetih rual hian, MNF sawrkarin Lammual a STADIUM sa tura ruahmanna thui tak an lo kalpui tawh chu, DELHI a A.R lam hotulute atangin engmah phalna an lo la neih loh avang leh Trafic in nasa taka a buai phah dawn avangin STADIUM hi Sipai Lammual a sa lovin, Mualpui-ah sak an tum tih a sawi.

HLEMHLETNA VENGTU TUR DIN DAWN

       Mizoram sawrkar thar, Congress sawrkar chuan an Campaign au hla leh an Manifesto zinga pakhat, Corruption tihbo-na atan "VIGILANCE AND SECUROTY COMMISSION" chu a din dawn tih a puang ta. He hna vil tur (Hotu tur) atan hian Pu.F.Lalremsiama, I.P.S Officer Pension chu ruat anih tur thu Congress thuchhuah chuan a tarlang. Pu.F.Lalremsiama hi 1965 Batch IPS, Assam Cadre a ni a, AGMU Cadre siam anih hnuah AGMU-ah lutin, Mizoram Sawrkara IGP leh Home Secretary anih laiin ama duh thuin a pension a, MPSC-ah rei vak lo member anih tawh bakah, kum 1993 Assembly inthlanah khan Aizawl East-II atangin MNF ticket a thlantlin a ni. He Commission hi Sawrkar thuhnuai a awm lo, huai taka hnathawk thei tura duan a niin, hemi bakah hian a tul anga eirukna leh Case lian tham chhui turin CBI-te chu General Consent pek an ni dawn tih Chief Minister Pu.Lalthanhawla chuan a puang bawk.

SAIRANG TO BAIRABI TUI KAWNG SIAM DAWN

       New Delhi a 11th national Road Safety Council meeting a kal, Transport Minister Pu.PC. Zoramsangliana chuan Union Minister for Shipping, Road Transport & Highways, Pu.T.R.Balu a hmu a, Union minister chuan Sairang leh Bairabi inkar tuia inkalpawhna, Inland-Water transport project atan cheng vaibelchhe 5.94 tihfel nghal alo tiam a. He thil hi kar khat chhunga tihfel beisei anih thu sawrkar thuchhuah chuan a tarlang. Ruahman anga tuia inkalpawhna hi peih anih hun chuan, Rail-Head awmna, bairabi atangin Aizawl hnaih te, Sairang thlengin bungrua a phurh thlen theih tawh dawn a ni.